17. Supāricariyavaggo

17. Supāricariyavaggo

1. Supāricariyattheraapadānaṃ

‘‘Padumo nāma nāmena, dvipadindo narāsabho;

Pavanā abhinikkhamma, dhammaṃ deseti cakkhumā.

‘‘Yakkhānaṃ samayo āsi, avidūre mahesino;

Yena kiccena sampattā, ajjhāpekkhiṃsu tāvade.

‘‘Buddhassa giramaññāya, amatassa ca desanaṃ;

Pasannacitto sumano, apphoṭetvā upaṭṭhahiṃ.

‘‘Suciṇṇassa phalaṃ passa, upaṭṭhānassa satthuno;

Tiṃsakappasahassesu, duggatiṃ nupapajjahaṃ.

‘‘Ūnatiṃse kappasate, samalaṅkatanāmako;

Sattaratanasampanno, cakkavattī mahabbalo.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā supāricariyo thero imā gāthāyo abhāsitthāti.

Supāricariyattherassāpadānaṃ paṭhamaṃ.

2. Kaṇaverapupphiyattheraapadānaṃ

‘‘Siddhattho nāma bhagavā, lokajeṭṭho narāsabho;

Purakkhato sāvakehi, nagaraṃ paṭipajjatha.

‘‘Rañño antepure āsiṃ, gopako abhisammato;

Pāsāde upaviṭṭhohaṃ, addasaṃ lokanāyakaṃ.

‘‘Kaṇaveraṃ [karavīraṃ (sakkatānulomaṃ), kaṇavīraṃ (pākata)] gahetvāna, bhikkhusaṅghe samokiriṃ;

Buddhassa visuṃ katvāna, tato bhiyyo samokiriṃ.

‘‘Catunnavutito kappe, yaṃ pupphamabhipūjayiṃ [ropayiṃ (syā.)];

Duggatiṃ nābhijānāmi, buddhapūjāyidaṃ phalaṃ.

‘‘Sattāsītimhito kappe, caturāsuṃ mahiddhikā;

Sattaratanasampannā, cakkavattī mahabbalā.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā kaṇaverapupphiyo thero imā gāthāyo abhāsitthāti.

Kaṇaverapupphiyattherassāpadānaṃ dutiyaṃ.

3. Khajjakadāyakattheraapadānaṃ

‘‘Tissassa kho bhagavato, pubbe phalamadāsahaṃ;

Nāḷikerañca pādāsiṃ, khajjakaṃ abhisammataṃ.

‘‘Buddhassa tamahaṃ datvā, tissassa tu mahesino;

Modāmahaṃ kāmakāmī, upapajjiṃ [kāmakārī, upapajjaṃ (sī.)] yamicchakaṃ [sabbatthapi evameva dissati].

‘‘Dvenavute ito kappe, yaṃ dānamadadiṃ tadā;

Duggatiṃ nābhijānāmi, phaladānassidaṃ phalaṃ.

‘‘Ito terasakappamhi, rājā indasamo ahu;

Sattaratanasampanno, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā khajjakadāyako thero imā gāthāyo abhāsitthāti.

Khajjakadāyakattherassāpadānaṃ tatiyaṃ.

4. Desapūjakattheraapadānaṃ

‘‘Atthadassī tu bhagavā, lokajeṭṭho narāsabho;

Abbhuggantvāna vehāsaṃ, gacchate anilañjase.

‘‘Yamhi dese ṭhito satthā, abbhuggacchi mahāmuni;

Tāhaṃ desaṃ apūjesiṃ, pasanno sehi pāṇibhi.

‘‘Aṭṭhārase kappasate, addasaṃ yaṃ mahāmuniṃ;

Duggatiṃ nābhijānāmi, desapūjāyidaṃ phalaṃ.

‘‘Ekādase kappasate, gosujātasanāmako;

Sattaratanasampanno, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā desapūjako thero imā gāthāyo abhāsitthāti.

Desapūjakattherassāpadānaṃ catutthaṃ.

5. Kaṇikārachattiyattheraapadānaṃ

‘‘Vessabhū nāma sambuddho, lokajeṭṭho narāsabho;

Divāvihārāya muni, ogāhayi mahāvanaṃ.

‘‘Kaṇikāraṃ ocinitvā, chattaṃ katvānahaṃ tadā;

Pupphacchadanaṃ katvāna, buddhassa abhiropayiṃ.

‘‘Ekattiṃse ito kappe, yaṃ pupphamabhiropayiṃ;

Duggatiṃ nābhijānāmi, buddhapūjāyidaṃ phalaṃ.

‘‘Ito vīsatikappamhi, soṇṇābhā aṭṭha khattiyā;

Sattaratanasampannā, cakkavattī mahabbalā.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā kaṇikārachattiyo thero imā gāthāyo abhāsitthāti.

Kaṇikārachattiyattherassāpadānaṃ pañcamaṃ.

6. Sappidāyakattheraapadānaṃ

‘‘Phusso nāmāsi [nāmātha (sī.)] bhagavā, āhutīnaṃ paṭiggaho;

Gacchate vīthiyaṃ vīro, nibbāpento mahājanaṃ.

‘‘Anupubbena bhagavā, āgacchi mama santikaṃ;

Tato taṃ [tatohaṃ (sī. syā.)] pattaṃ paggayha, sappitelamadāsahaṃ.

‘‘Dvenavute ito kappe, yaṃ sappimadadiṃ tadā;

Duggatiṃ nābhijānāmi, sappidānassidaṃ phalaṃ.

‘‘Chappaññāse ito kappe, eko āsi samodako;

Sattaratanasampanno, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā sappidāyako thero imā gāthāyo abhāsitthāti.

Sappidāyakattherassāpadānaṃ chaṭṭhaṃ.

7. Yūthikapupphiyattheraapadānaṃ

‘‘Candabhāgānadītīre , anusotaṃ vajāmahaṃ;

Sayambhuṃ addasaṃ tattha, sālarājaṃva phullitaṃ.

‘‘Pupphaṃ yūthikamādāya, upagacchiṃ mahāmuniṃ;

Pasannacitto sumano, buddhassa abhiropayiṃ.

‘‘Catunnavutito kappe, yaṃ pupphamabhiropayiṃ;

Duggatiṃ nābhijānāmi, buddhapūjāyidaṃ phalaṃ.

‘‘Sattasaṭṭhimhito kappe, eko sāmuddharo ahu;

Sattaratanasampanno, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā yūthikapupphiyo thero imā gāthāyo abhāsitthāti.

Yūthikapupphiyattherassāpadānaṃ sattamaṃ.

8. Dussadāyakattheraapadānaṃ

‘‘Tivarāyaṃ pure ramme, rājaputtosahaṃ [rājaputto ahaṃ (sī. syā.)] tadā;

Paṇṇākāraṃ labhitvāna, upasantassadāsahaṃ.

‘‘Adhivāsesi bhagavā, vatthaṃ [navaṃ (ka.)] hatthena āmasi;

Siddhattho adhivāsetvā, vehāsaṃ nabhamuggami.

‘‘Buddhassa gacchamānassa, dussā dhāvanti pacchato;

Tattha cittaṃ pasādesiṃ, buddho no aggapuggalo.

‘‘Catunnavutito kappe, yaṃ dussamadadiṃ tadā;

Duggatiṃ nābhijānāmi, dussadānassidaṃ phalaṃ.

‘‘Sattasaṭṭhimhito kappe, cakkavattī tadā ahu;

Parisuddhoti nāmena, manujindo mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā dussadāyako thero imā gāthāyo abhāsitthāti.

Dussadāyakattherassāpadānaṃ aṭṭhamaṃ.

9. Samādapakattheraapadānaṃ

‘‘Nagare bandhumatiyā, mahāpūgagaṇo ahu;

Tesāhaṃ pavaro āsiṃ, mama baddhacarā [paṭṭhacarā (syā.)] ca te.

‘‘Sabbe te sannipātetvā, puññakamme samādayiṃ;

Māḷaṃ kassāma saṅghassa, puññakkhettaṃ anuttaraṃ.

‘‘Sādhūti te paṭissutvā, mama chandavasānugā;

Niṭṭhāpetvā ca taṃ māḷaṃ, vipassissa adamhase.

‘‘Ekanavutito kappe, yaṃ māḷamadadiṃ tadā;

Duggatiṃ nābhijānāmi, māḷadānassidaṃ phalaṃ.

‘‘Ekūnasattatikappe [ekūnasaṭṭhikappamhi (sī. syā.)],

Eko āsi janādhipo.

Ādeyyo nāma nāmena, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā samādapako thero imā gāthāyo abhāsitthāti.

Samādapakattherassāpadānaṃ navamaṃ.

10. Pañcaṅguliyattheraapadānaṃ

‘‘Tisso nāmāsi bhagavā, lokajeṭṭho narāsabho;

Pavisati gandhakuṭiṃ, vihārakusalo muni.

‘‘Sugandhamālamādāya, agamāsiṃ jinantikaṃ;

Apasaddo ca sambuddhe, pañcaṅgulimadāsahaṃ.

‘‘Dvenavute ito kappe, yaṃ gandhamabhiropayiṃ;

Duggatiṃ nābhijānāmi, pañcaṅgulissidaṃ [pañcaṅguliyidaṃ (sī.)] phalaṃ.

‘‘Dvesattatimhito kappe, rājā āsiṃ sayampabho;

Sattaratanasampanno, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā pañcaṅguliyo thero imā gāthāyo abhāsitthāti;

Pañcaṅguliyattherassāpadānaṃ dasamaṃ.

Supāricariyavaggo sattarasamo.

Tassuddānaṃ –

Supāricari kaṇaverī, khajjako desapūjako;

Kaṇikāro sappidado, yūthiko dussadāyako;

Māḷo ca pañcaṅguliko, catupaññāsa gāthakāti.

* Bài viết trích trong Khuddakanikāya >> Suttapiṭaka >> Tipiṭaka (Mūla), nguồn Tipitaka.org. Tải sách PDF tại đây.