20. Tamālapupphiyavaggo

20. Tamālapupphiyavaggo

1. Tamālapupphiyattheraapadānaṃ

‘‘Cullāsītisahassāni , thambhā sovaṇṇayā ahū;

Devalaṭṭhipaṭibhāgaṃ, vimānaṃ me sunimmitaṃ.

‘‘Tamālapupphaṃ paggayha, vippasannena cetasā;

Buddhassa abhiropayiṃ, sikhino lokabandhuno.

‘‘Ekattiṃse ito kappe, yaṃ kammamakariṃ tadā;

Duggatiṃ nābhijānāmi, buddhapūjāyidaṃ phalaṃ.

‘‘Ito vīsatime kappe, candatittoti ekako;

Sattaratanasampanno, cakkavattī mahabbalo.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā tamālapupphiyo thero imā gāthāyo abhāsitthāti.

Tamālapupphiyattherassāpadānaṃ paṭhamaṃ.

2. Tiṇasanthārakattheraapadānaṃ

‘‘Yadā vanavāsī [yaṃ dāyavāsiko (sī.)] isi, tiṇaṃ lāyati satthuno;

Sabbe padakkhiṇāvaṭṭā [padakkhiṇāvattā (sī. syā.)], pathabyā [puthavyā (sī.)] nipatiṃsu te.

‘‘Tamahaṃ tiṇamādāya, santhariṃ dharaṇuttame;

Tīṇeva tālapattāni, āharitvānahaṃ tadā.

‘‘Tiṇena chadanaṃ katvā, siddhatthassa adāsahaṃ;

Sattāhaṃ dhārayuṃ tassa [tattha (syā.)], devamānusasatthuno.

‘‘Catunnavutito kappe, yaṃ tiṇaṃ adadiṃ tadā;

Duggatiṃ nābhijānāmi, tiṇadānassidaṃ phalaṃ.

‘‘Pañcasaṭṭhimhito kappe, cattārosuṃ mahaddhanā;

Sattaratanasampannā, cakkavattī mahabbalā.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā tiṇasanthārako thero imā gāthāyo abhāsitthāti.

Tiṇasanthārakattherassāpadānaṃ dutiyaṃ.

3. Khaṇḍapulliyattheraapadānaṃ

‘‘Phussassa kho bhagavato, thūpo āsi mahāvane;

Kuñjarehi tadā bhinno, parūḷho pādapo [parūḷhapādapo (sī.), saṃrūḷho pādapo (syā.)] tahiṃ.

‘‘Visamañca samaṃ katvā, sudhāpiṇḍaṃ adāsahaṃ;

Tilokagaruno tassa, guṇehi paritosito [parito suto (ka.)].

‘‘Dvenavute ito kappe, yaṃ kammamakariṃ tadā;

Duggatiṃ nābhijānāmi, sudhāpiṇḍassidaṃ phalaṃ.

‘‘Sattasattatikappamhi, jitasenāsuṃ soḷasa;

Sattaratanasampannā, cakkavattī mahabbalā.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā khaṇḍaphulliyo thero imā gāthāyo abhāsitthāti.

Khaṇḍapulliyattherassāpadānaṃ tatiyaṃ.

4. Asokapūjakattheraapadānaṃ

‘‘Tivarāyaṃ [tipurāyaṃ (syā.)] pure ramme, rājuyyānaṃ ahu tadā;

Uyyānapālo tatthāsiṃ, rañño baddhacaro ahaṃ.

‘‘Padumo nāma nāmena, sayambhū sappabho ahu;

Nisinnaṃ [nisinno (ka.)] puṇḍarīkamhi, chāyā na jahi taṃ muniṃ.

‘‘Asokaṃ pupphitaṃ disvā, piṇḍibhāraṃ sudassanaṃ;

Buddhassa abhiropesiṃ, jalajuttamanāmino.

‘‘Catunnavutito kappe, yaṃ pupphamabhiropayiṃ;

Duggatiṃ nābhijānāmi, buddhapūjāyidaṃ phalaṃ.

‘‘Sattatiṃsamhito kappe, soḷasa araṇañjahā [aruṇañjahā (sī.)];

Sattaratanasampannā, cakkavattī mahabbalā.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā asokapūjako thero imā gāthāyo abhāsitthāti.

Asokapūjakattherassāpadānaṃ catutthaṃ.

5. Aṅkolakattheraapadānaṃ

‘‘Aṅkolaṃ pupphitaṃ disvā, mālāvaraṃ sakosakaṃ [samogadhaṃ (syā.)];

Ocinitvāna taṃ pupphaṃ, agamaṃ buddhasantikaṃ.

‘‘Siddhattho tamhi samaye, patilīno mahāmuni;

Muhuttaṃ paṭimānetvā, guhāyaṃ pupphamokiriṃ.

‘‘Catunnavutito kappe, yaṃ pupphamabhipūjayiṃ;

Duggatiṃ nābhijānāmi, pupphadānassidaṃ [buddhapūjāyidaṃ (sī. syā.)] phalaṃ.

‘‘Chattiṃsamhi ito kappe, āseko devagajjito;

Sattaratanasampanno, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā aṅkolako thero imā gāthāyo abhāsitthāti.

Aṅkolakattherassāpadānaṃ pañcamaṃ.

6. Kisalayapūjakattheraapadānaṃ

‘‘Nagare dvāravatiyā, mālāvaccho mamaṃ ahu;

Udapāno ca tattheva, pādapānaṃ virohano.

‘‘Sabalena upatthaddho, siddhattho aparājito;

Mamānukampamāno so, gacchate anilañjase.

‘‘Aññaṃ kiñci na passāmi, pūjāyoggaṃ mahesino;

Asokaṃ pallavaṃ disvā, ākāse ukkhipiṃ ahaṃ.

‘‘Buddhassa te kisalayā, gacchato yanti pacchato;

Tāhaṃ disvāna saṃvijiṃ [sohaṃ disvāna taṃ iddhiṃ (sī. syā.)], aho buddhassuḷāratā.

‘‘Catunnavutito kappe, pallavaṃ abhiropayiṃ;

Duggatiṃ nābhijānāmi, buddhapūjāyidaṃ phalaṃ.

‘‘Sattatiṃse [sattavīse (sī. syā.)] ito kappe, eko ekissaro ahu;

Sattaratanasampanno, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā kisalayapūjako thero imā gāthāyo abhāsitthāti.

Kisalayapūjakattherassāpadānaṃ chaṭṭhaṃ.

7. Tindukadāyakattheraapadānaṃ

‘‘Giriduggacaro āsiṃ, makkaṭo thāmavegiko;

Phalinaṃ tindukaṃ disvā, buddhaseṭṭhaṃ anussariṃ.

‘‘Nikkhamitvā katipāhaṃ, viciniṃ lokanāyakaṃ;

Pasannacitto sumano, siddhatthaṃ tibhavantaguṃ.

‘‘Mama saṅkappamaññāya, satthā loke anuttaro;

Khīṇāsavasahassehi, āgacchi mama santikaṃ.

‘‘Pāmojjaṃ janayitvāna, phalahattho upāgamiṃ;

Paṭiggahesi bhagavā, sabbaññū vadataṃ varo.

‘‘Catunnavutito kappe, yaṃ phalaṃ adadiṃ tadā;

Duggatiṃ nābhijānāmi, phaladānassidaṃ phalaṃ.

‘‘Sattapaññāsakappamhi, upanandasanāmako;

Sattaratanasampanno, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā tindukadāyako thero imā gāthāyo abhāsitthāti.

Tindukadāyakattherassāpadānaṃ sattamaṃ.

8. Muṭṭhipūjakattheraapadānaṃ

‘‘Sumedho nāma bhagavā, lokajeṭṭho narāsabho;

Pacchime anukampāya, padhānaṃ padahī jino.

‘‘Tassa caṅkamamānassa, dvipadindassa tādino;

Girinelassa pupphānaṃ, muṭṭhiṃ buddhassa ropayiṃ.

‘‘Tena cittappasādena, sukkamūlena codito;

Tiṃsakappasahassāni, duggatiṃ nupapajjahaṃ.

‘‘Tevīsatikappasate, sunelo nāma khattiyo;

Sattaratanasampanno, eko āsiṃ mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā muṭṭhipūjako thero imā gāthāyo abhāsitthāti.

Muṭṭhipūjakattherassāpadānaṃ aṭṭhamaṃ.

9. Kiṃkaṇikapupphiyattheraapadānaṃ

‘‘Sumaṅgaloti nāmena, sayambhū aparājito;

Pavanā nikkhamitvāna, nagaraṃ pāvisī jino.

‘‘Piṇḍacāraṃ caritvāna, nikkhamma nagarā muni;

Katakiccova sambuddho, so vasī vanamantare.

‘‘Kiṃkaṇipupphaṃ paggayha, buddhassa abhiropayiṃ;

Pasannacitto sumano, sayambhussa mahesino.

‘‘Catunnavutito kappe, yaṃ pupphamabhiropayiṃ;

Duggatiṃ nābhijānāmi, buddhapūjāyidaṃ phalaṃ.

‘‘Chaḷāsītimhito kappe, apilāsisanāmako;

Sattaratanasampanno, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā kiṃkaṇikapupphiyo thero imā gāthāyo abhāsitthāti.

Kiṃkaṇikapupphiyattherassāpadānaṃ navamaṃ.

10. Yūthikapupphiyattheraapadānaṃ

‘‘Padumuttaro nāma jino, āhutīnaṃ paṭiggaho;

Pavanā nikkhamitvāna, vihāraṃ yāti cakkhumā.

‘‘Ubho hatthehi paggayha, yūthikaṃ pupphamuttamaṃ;

Buddhassa abhiropayiṃ, mettacittassa tādino.

‘‘Tena cittappasādena, anubhotvāna sampadā;

Kappānaṃ satasahassaṃ, duggatiṃ nupapajjahaṃ.

‘‘Ito paññāsakappesu, eko āsiṃ janādhipo;

Samittanandano nāma, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā yūthikapupphiyo thero imā gāthāyo abhāsitthāti;

Yūthikapupphiyattherassāpadānaṃ dasamaṃ.

Tamālapupphiyavaggo vīsatimo.

Tassuddānaṃ –

Tamālatiṇasanthāro , khaṇḍaphulli asokiyo;

Aṅkolakī kisalayo, tinduko nelapupphiyo;

Kiṃkaṇiko yūthiko ca, gāthā paññāsa aṭṭha cāti.

Atha vagguddānaṃ –

Bhikkhādāyī parivāro, sereyyo sobhito tathā;

Chattañca bandhujīvī ca, supāricariyopi ca.

Kumudo kuṭajo ceva, tamāli dasamo kato;

Chasatāni ca gāthāni, chasaṭṭhi ca tatuttari.

Bhikkhāvaggadasakaṃ.

Dutiyasatakaṃ samattaṃ.

* Bài viết trích trong Khuddakanikāya >> Suttapiṭaka >> Tipiṭaka (Mūla), nguồn Tipitaka.org. Tải sách PDF tại đây.