Tela-madhu-phāṇita-maccha-maṁsa-khīra-dadhiviññāpanasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena chabbaggiyā bhikkhuniyo telaṁ viññāpetvā bhuñjanti. …pe… madhuṁ viññāpetvā bhuñjanti. …pe… phāṇitaṁ viññāpetvā bhuñjanti. …pe… macchaṁ viññāpetvā bhuñjanti. …pe… maṁsaṁ viññāpetvā bhuñjanti. …pe… khīraṁ viññāpetvā bhuñjanti. …pe… dadhiṁ viññāpetvā bhuñjanti. Manussā ujjhāyanti khiyyanti vipācenti— “kathañhi nāma bhikkhuniyo dadhiṁ viññāpetvā bhuñjissanti. Kassa sampannaṁ na manāpaṁ, kassa sāduṁ na ruccatī”ti. Assosuṁ kho bhikkhuniyo tesaṁ manussānaṁ ujjhāyantānaṁ khiyyantānaṁ vipācentānaṁ. Yā tā bhikkhuniyo appicchā … pe … tā ujjhāyanti khiyyanti vipācenti— “kathañhi nāma chabbaggiyā bhikkhuniyo dadhiṁ viññāpetvā bhuñjissantī”ti … pe … “saccaṁ kira, bhikkhave, chabbaggiyā bhikkhuniyo dadhiṁ viññāpetvā bhuñjantī”ti? “Saccaṁ, bhagavā”ti. Vigarahi buddho bhagavā … pe … kathañhi nāma, bhikkhave, chabbaggiyā bhikkhuniyo dadhiṁ viññāpetvā bhuñjissanti. Netaṁ, bhikkhave, appasannānaṁ vā pasādāya … pe … evañca pana, bhikkhave, bhikkhuniyo imaṁ sikkhāpadaṁ uddisantu—

“Yā pana bhikkhunī dadhiṁ viññāpetvā bhuñjeyya, paṭidesetabbaṁ tāya bhikkhuniyā—

‘gārayhaṁ, ayye, dhammaṁ āpajjiṁ asappāyaṁ pāṭidesanīyaṁ, taṁ paṭidesemī’”ti. Evañcidaṁ bhagavatā bhikkhunīnaṁ sikkhāpadaṁ paññattaṁ hoti.

Tena kho pana samayena bhikkhuniyo gilānā honti. Gilānapucchikā bhikkhuniyo gilānā bhikkhuniyo etadavocuṁ— “kacci, ayye, khamanīyaṁ, kacci yāpanīyan”ti? “Pubbe mayaṁ, ayye, dadhiṁ viññāpetvā bhuñjimhā, tena no phāsu hoti; idāni pana ‘bhagavatā paṭikkhittan’ti kukkuccāyantā na viññāpema, tena no na phāsu hotī”ti … pe … bhagavato etamatthaṁ ārocesuṁ … pe … anujānāmi, bhikkhave, gilānāya bhikkhuniyā dadhiṁ viññāpetvā bhuñjituṁ. Evañca pana, bhikkhave, bhikkhuniyo imaṁ sikkhāpadaṁ uddisantu—

“Yā pana bhikkhunī agilānā (telaṁ …pe…

madhuṁ …pe…

phāṇitaṁ …pe…

macchaṁ …pe…

maṁsaṁ …pe…

khīraṁ …pe…)

dadhiṁ viññāpetvā bhuñjeyya, paṭidesetabbaṁ tāya bhikkhuniyā— ‘gārayhaṁ, ayye, dhammaṁ āpajjiṁ asappāyaṁ pāṭidesanīyaṁ, taṁ paṭidesemī’”ti.

Yā panāti yā yādisā … pe … bhikkhunīti … pe … ayaṁ imasmiṁ atthe adhippetā bhikkhunīti. Agilānā nāma yassā vinā dadhinā phāsu hoti. Gilānā nāma yassā vinā dadhinā na phāsu hoti. Telaṁ nāma tilatelaṁ sāsapatelaṁ madhukatelaṁ eraṇḍatelaṁ vasātelaṁ. Madhu nāma makkhikāmadhu. Phāṇitaṁ nāma ucchumhā nibbattaṁ. Maccho nāma odako vuccati. Maṁsaṁ nāma yesaṁ maṁsaṁ kappati tesaṁ maṁsaṁ. Khīraṁ nāma gokhīraṁ vā ajikākhīraṁ vā mahiṁsakhīraṁ vā yesaṁ maṁsaṁ kappati tesaṁ khīraṁ. Dadhi nāma tesaññeva dadhi. Agilānā attano atthāya viññāpeti, payoge dukkaṭaṁ. Paṭilābhena “bhuñjissāmī”ti paṭiggaṇhāti, āpatti dukkaṭassa. Ajjhohāre ajjhohāre āpatti pāṭidesanīyassa.

Agilānā agilānasaññā dadhiṁ viññāpetvā bhuñjati, āpatti pāṭidesanīyassa. Agilānā vematikā dadhiṁ viññāpetvā bhuñjati, āpatti pāṭidesanīyassa. Agilānā gilānasaññā dadhiṁ viññāpetvā bhuñjati, āpatti pāṭidesanīyassa. Gilānā agilānasaññā, āpatti dukkaṭassa. Gilānā vematikā, āpatti dukkaṭassa. Gilānā gilānasaññā anāpatti.

Anāpatti— gilānāya, gilānā hutvā viññāpetvā agilānā bhuñjati, gilānāya sesakaṁ bhuñjati, ñātakānaṁ, pavāritānaṁ, aññassatthāya, attano dhanena, ummattikāya, ādikammikāyāti. Aṭṭhamapāṭidesanīyasikkhāpadaṁ niṭṭhitaṁ. Uddiṭṭhā kho, ayyāyo, aṭṭha pāṭidesanīyā dhammā. Tatthāyyāyo pucchāmi— “kaccittha parisuddhā”? Dutiyampi pucchāmi— “kaccittha parisuddhā”? Tatiyampi pucchāmi— “kaccittha parisuddhā”? Parisuddhetthāyyāyo, tasmā tuṇhī, evametaṁ dhārayāmīti. Bhikkhunivibhaṅge pāṭidesanīyakaṇḍaṁ niṭṭhitaṁ.