Pārāpariyattheragāthā

Samaṇassa ahu cintā, pupphitamhi mahāvane; Ekaggassa nisinnassa, pavivittassa jhāyino.

“Aññathā lokanāthamhi, tiṭṭhante purisuttame; Iriyaṁ āsi bhikkhūnaṁ, aññathā dāni dissati.

Sītavātaparittāṇaṁ, hirikopīnachādanaṁ; Mattaṭṭhiyaṁ abhuñjiṁsu, santuṭṭhā itarītare.

Paṇītaṁ yadi vā lūkhaṁ, appaṁ vā yadi vā bahuṁ; Yāpanatthaṁ abhuñjiṁsu, agiddhā nādhimucchitā.

Jīvitānaṁ parikkhāre, bhesajje atha paccaye; Na bāḷhaṁ ussukā āsuṁ, yathā te āsavakkhaye.

Araññe rukkhamūlesu, kandarāsu guhāsu ca; Vivekamanubrūhantā, vihaṁsu tapparāyaṇā.

Nīcā niviṭṭhā subharā, mudū atthaddhamānasā; Abyāsekā amukharā, atthacintā vasānugā.

Tato pāsādikaṁ āsi, gataṁ bhuttaṁ nisevitaṁ; Siniddhā teladhārāva, ahosi iriyāpatho.

Sabbāsavaparikkhīṇā, mahājhāyī mahāhitā; Nibbutā dāni te therā, parittā dāni tādisā.

Kusalānañca dhammānaṁ, paññāya ca parikkhayā; Sabbākāravarūpetaṁ, lujjate jinasāsanaṁ.

Pāpakānañca dhammānaṁ, kilesānañca yo utu; Upaṭṭhitā vivekāya, ye ca saddhammasesakā.

Te kilesā pavaḍḍhantā, āvisanti bahuṁ janaṁ; Kīḷanti maññe bālehi, ummattehiva rakkhasā.

Kilesehābhibhūtā te, tena tena vidhāvitā; Narā kilesavatthūsu, sasaṅgāmeva ghosite.

Pariccajitvā saddhammaṁ, aññamaññehi bhaṇḍare; Diṭṭhigatāni anventā, idaṁ seyyoti maññare.

Dhanañca puttaṁ bhariyañca, chaḍḍayitvāna niggatā; Kaṭacchubhikkhahetūpi, akicchāni nisevare.

Udarāvadehakaṁ bhutvā, sayantuttānaseyyakā; Kathaṁ vattenti paṭibuddhā, yā kathā satthugarahitā.

Sabbakārukasippāni, cittiṁ katvāna sikkhare; Avūpasantā ajjhattaṁ, sāmaññatthotiacchati.

Mattikaṁ telacuṇṇañca, udakāsanabhojanaṁ; Gihīnaṁ upanāmenti, ākaṅkhantā bahuttaraṁ.

Dantaponaṁ kapitthañca, pupphaṁ khādaniyāni ca; Piṇḍapāte ca sampanne, ambe āmalakāni ca.

Bhesajjesu yathā vejjā, kiccākicce yathā gihī; Gaṇikāva vibhūsāyaṁ, issare khattiyā yathā.

Nekatikā vañcanikā, kūṭasakkhī apāṭukā; Bahūhi parikappehi, āmisaṁ paribhuñjare.

Lesakappe pariyāye, parikappenudhāvitā; Jīvikatthā upāyena, saṅkaḍḍhanti bahuṁ dhanaṁ.

Upaṭṭhāpenti parisaṁ, kammato no ca dhammato; Dhammaṁ paresaṁ desenti, lābhato no ca atthato.

Saṅghalābhassa bhaṇḍanti, saṅghato paribāhirā; Paralābhopajīvantā, ahirīkā na lajjare.

Nānuyuttā tathā eke, muṇḍā saṅghāṭipārutā; Sambhāvanaṁyevicchanti, lābhasakkāramucchitā.

Evaṁ nānappayātamhi, na dāni sukaraṁ tathā; Aphusitaṁ vā phusituṁ, phusitaṁ vānurakkhituṁ.

Yathā kaṇṭakaṭṭhānamhi, careyya anupāhano; Satiṁ upaṭṭhapetvāna, evaṁ gāme munī care.

Saritvā pubbake yogī, tesaṁ vattamanussaraṁ; Kiñcāpi pacchimo kālo, phuseyya amataṁ padaṁ.

Idaṁ vatvā sālavane, samaṇo bhāvitindriyo; Brāhmaṇo parinibbāyī, isi khīṇapunabbhavo”ti. … Pārāpariyo thero … Vīsatinipāto niṭṭhito.

Adhimutto pārāpariyo, telakāni raṭṭhapālo; Mālukyaselo bhaddiyo, aṅguli dibbacakkhuko; Pārāpariyo dasete, vīsamhi parikittitā; Gāthāyo dve satā honti, pañcatālīsa uttarinti.