28. Suvaṇṇabibbohanavaggo

28. Suvaṇṇabibbohanavaggo

1. Suvaṇṇabibbohaniyattheraapadānaṃ

‘‘Ekāsanaṃ ahamadaṃ, pasanno sehi pāṇibhi;

Bibbohanañca [bimbohanañca (sī. pī.)] pādāsiṃ, uttamatthassa pattiyā.

‘‘Ekanavutito kappe, bibbohanamadāsahaṃ;

Duggatiṃ nābhijānāmi, bibbohanassidaṃ phalaṃ.

‘‘Ito tesaṭṭhime kappe, asamo nāma khattiyo;

Sattaratanasampanno, cakkavattī mahabbalo.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā suvaṇṇabibbohaniyo thero imā gāthāyo abhāsitthāti.

Suvaṇṇabibbohaniyattherassāpadānaṃ paṭhamaṃ.

2. Tilamuṭṭhidāyakattheraapadānaṃ

‘‘Mama saṅkappamaññāya, satthā lokagganāyako;

Manomayena kāyena, iddhiyā upasaṅkami.

‘‘Satthāraṃ upasaṅkantaṃ, vanditvā purisuttamaṃ;

Pasannacitto sumano, tilamuṭṭhimadāsahaṃ.

‘‘Ekanavutito kappe, yaṃ dānamadadiṃ tadā;

Duggatiṃ nābhijānāmi, tilamuṭṭhiyidaṃ phalaṃ.

‘‘Ito soḷasakappamhi, tantiso [khantiyo (syā.)] nāma khattiyo;

Sattaratanasampanno, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā tilamuṭṭhidāyako thero imā gāthāyo abhāsitthāti.

Tilamuṭṭhidāyakattherassāpadānaṃ dutiyaṃ.

3. Caṅkoṭakiyattheraapadānaṃ

‘‘Mahāsamuddaṃ nissāya, vasatī pabbatantare;

Paccuggantvāna katvāna [paccuggantvāna’kāsahaṃ (aṭṭha.), paccuggamanaṃ katvāna (?)], caṅkoṭaka [caṅgoṭaka (sī.)] madāsahaṃ.

‘‘Siddhatthassa mahesino, sabbasattānukampino [sayambhussānukampino (syā.)];

Pupphacaṅkoṭakaṃ datvā, kappaṃ saggamhi modahaṃ.

‘‘Catunnavutito kappe, caṅkoṭakamadaṃ tadā;

Duggatiṃ nābhijānāmi, caṅkoṭakassidaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā caṅkoṭakiyo thero imā gāthāyo abhāsitthāti.

Caṅkoṭakiyattherassāpadānaṃ tatiyaṃ.

4. Abbhañjanadāyakattheraapadānaṃ

‘‘Koṇḍaññassa bhagavato, vītarāgassa tādino;

Ākāsasamacittassa [akakkasacittassātha (aṭṭha.)], nippapañcassa jhāyino.

‘‘Sabbamohātivattassa, sabbalokahitesino;

Abbhañjanaṃ mayā dinnaṃ, dvipadindassa tādino.

‘‘Aparimeyye ito kappe, abbhañjanamadaṃ tadā [ambhañjanamadāsahaṃ (syā.)];

Duggatiṃ nābhijānāmi, abbhañjanassidaṃ phalaṃ.

‘‘Ito pannarase kappe, cirappo nāma khattiyo;

Sattaratanasampanno, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā abbhañjanadāyako thero imā gāthāyo abhāsitthāti.

Abbhañjanadāyakattherassāpadānaṃ catutthaṃ.

5. Ekañjalikattheraapadānaṃ

‘‘Udumbare vasantassa, niyate paṇṇasanthare;

Vutthokāso mayā dinno, samaṇassa mahesino.

‘‘Tissassa dvipadindassa, lokanāthassa tādino;

Añjaliṃ paggahetvāna, santhariṃ pupphasantharaṃ.

‘‘Dvenavute ito kappe, yaṃ kariṃ pupphasantharaṃ;

Duggatiṃ nābhijānāmi, santharassa idaṃ phalaṃ.

‘‘Ito cuddasakappamhi, ahosiṃ manujādhipo;

Ekaañjaliko nāma, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā ekañjaliko thero imā gāthāyo abhāsitthāti.

Ekañjalikattherassāpadānaṃ pañcamaṃ.

6. Potthakadāyakattheraapadānaṃ

‘‘Satthāraṃ dhammamārabbha, saṅghañcāpi mahesinaṃ;

Potthadānaṃ mayā dinnaṃ, dakkhiṇeyye anuttare.

‘‘Ekanavutito kappe, yaṃ kammamakariṃ tadā;

Duggatiṃ nābhijānāmi, potthadānassidaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā potthakadāyako thero imā gāthāyo abhāsitthāti.

Potthakadāyakattherassāpadānaṃ chaṭṭhaṃ.

7. Citakapūjakattheraapadānaṃ

‘‘Candabhāgānadītīre, anusotaṃ vajāmahaṃ;

Satta māluvapupphāni, citamāropayiṃ ahaṃ.

‘‘Catunnavutito kappe, citakaṃ yamapūjayiṃ;

Duggatiṃ nābhijānāmi, citapūjāyidaṃ phalaṃ.

‘‘Sattasaṭṭhimhito kappe, paṭijaggasanāmakā;

Sattaratanasampannā, sattāsuṃ cakkavattino [paṭijaggasanāmako; sattaratanasampanno, cakkavattī mahabbalo (syā.)].

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā citakapūjako thero imā gāthāyo abhāsitthāti.

Citakapūjakattherassāpadānaṃ sattamaṃ.

8. Āluvadāyakattheraapadānaṃ

‘‘Pabbate himavantamhi, mahāsindhu sudassanā;

Tatthaddasaṃ vītarāgaṃ, suppabhāsaṃ sudassanaṃ.

‘‘Paramopasame yuttaṃ, disvā vimhitamānaso;

Āluvaṃ tassa pādāsiṃ, pasanno sehi pāṇibhi.

‘‘Ekattiṃse ito kappe, yaṃ phalamadadiṃ tadā;

Duggatiṃ nābhijānāmi, āluvassa idaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā āluvadāyako thero imā gāthāyo abhāsitthāti.

Āluvadāyakattherassāpadānaṃ aṭṭhamaṃ.

9. Ekapuṇḍarīkattheraapadānaṃ

‘‘Romaso nāma nāmena, sayambhū subbato [sappabho (syā.)] tadā;

Puṇḍarīkaṃ mayā dinnaṃ, vippasannena cetasā.

‘‘Catunnavutito kappe, puṇḍarīkamadaṃ tadā;

Duggatiṃ nābhijānāmi, puṇḍarīkassidaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā ekapuṇḍarīko thero imā gāthāyo abhāsitthāti.

Ekapuṇḍarīkattherassāpadānaṃ navamaṃ.

10. Taraṇīyattheraapadānaṃ

‘‘Mahāpathamhi visame, setu kārāpito mayā;

Taraṇatthāya lokassa, pasanno sehi pāṇibhi.

‘‘Ekanavutito kappe, yo setu kārito mayā;

Duggatiṃ nābhijānāmi, setudānassidaṃ phalaṃ.

‘‘Pañcapaññāsito kappe, eko āsiṃ samogadho;

Sattaratanasampanno, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā taraṇīyo thero imā gāthāyo abhāsitthāti.

Taraṇīyattherassāpadānaṃ dasamaṃ.

Suvaṇṇabibbohanavaggo aṭṭhavīsatimo.

Tassuddānaṃ –

Suvaṇṇaṃ tilamuṭṭhi ca, caṅkoṭabbhañjanañjalī;

Potthako citamāluvā, ekapuṇḍarī setunā;

Dvecattālīsa gāthāyo, gaṇitāyo vibhāvibhīti.

Ekādasamaṃ bhāṇavāraṃ.

* Bài viết trích trong Khuddakanikāya >> Suttapiṭaka >> Tipiṭaka (Mūla), nguồn Tipitaka.org. Tải sách PDF tại đây.