29. Paṇṇadāyakavaggo

29. Paṇṇadāyakavaggo

1. Paṇṇadāyakattheraapadānaṃ

‘‘Paṇṇasāle nisinnomhi, paṇṇabhojanabhojano;

Upaviṭṭhañca maṃ santaṃ, upāgacchi mahāisi [mahāmuni (sī.)].

‘‘Siddhattho lokapajjoto, sabbalokatikicchako;

Tassa paṇṇaṃ mayā dinnaṃ, nisinnaṃ [nisinnassa (syā. aṭṭha.)] paṇṇasanthare.

‘‘Catunnavutito kappe, yaṃ paṇṇamadadiṃ tadā;

Duggatiṃ nābhijānāmi, paṇṇadānassidaṃ phalaṃ.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā paṇṇadāyako thero imā gāthāyo abhāsitthāti.

Paṇṇadāyakattherassāpadānaṃ paṭhamaṃ.

2. Phaladāyakattheraapadānaṃ

‘‘Sinerusamasantoso , dharaṇīsama [dharaṇīdhara (sī. syā.)] sādiso;

Vuṭṭhahitvā samādhimhā, bhikkhāya mamupaṭṭhito.

‘‘Harītakaṃ [harītakiṃ (syā.)] āmalakaṃ, ambajambuvibhītakaṃ;

Kolaṃ bhallātakaṃ billaṃ, phārusakaphalāni ca.

‘‘Siddhatthassa mahesissa, sabbalokānukampino;

Tañca sabbaṃ mayā dinnaṃ, vippasannena cetasā.

‘‘Catunnavutito kappe, yaṃ phalaṃ adadiṃ tadā;

Duggatiṃ nābhijānāmi, phaladānassidaṃ phalaṃ.

‘‘Sattapaññāsito kappe, ekajjho nāma khattiyo;

Sattaratanasampanno, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā phaladāyako thero imā gāthāyo abhāsitthāti.

Phaladāyakattherassāpadānaṃ dutiyaṃ.

3. Paccuggamaniyattheraapadānaṃ

‘‘Sīhaṃ yathā vanacaraṃ, nisabhājāniyaṃ yathā;

Kakudhaṃ vilasantaṃva, āgacchantaṃ narāsabhaṃ.

‘‘Siddhatthaṃ lokapajjotaṃ, sabbalokatikicchakaṃ;

Akāsiṃ paccuggamanaṃ, vippasannena cetasā.

‘‘Catunnavutito kappe, paccuggacchiṃ narāsabhaṃ;

Duggatiṃ nābhijānāmi, paccuggamane idaṃ phalaṃ.

‘‘Sattatiṃse [sattavīse (sī. syā.)] ito kappe, eko āsiṃ janādhipo;

Saparivāroti nāmena, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā paccuggamaniyo thero imā gāthāyo abhāsitthāti.

Paccuggamaniyattherassāpadānaṃ tatiyaṃ.

4. Ekapupphiyattheraapadānaṃ

‘‘Dakkhiṇamhi duvāramhi, pisāco āsahaṃ tadā;

Addasaṃ virajaṃ buddhaṃ, pītaraṃsiṃva bhāṇumaṃ.

‘‘Vipassissa naraggassa, sabbalokahitesino;

Ekapupphaṃ mayā dinnaṃ, dvipadindassa tādino.

‘‘Ekanavutito kappe, yaṃ pupphamadadiṃ tadā;

Duggatiṃ nābhijānāmi, buddhapūjāyidaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā ekapupphiyo thero imā gāthāyo abhāsitthāti.

Ekapupphiyattherassāpadānaṃ catutthaṃ.

5. Maghavapupphiyattheraapadānaṃ

‘‘Nammadānadiyā tīre, sayambhū aparājito;

Samādhiṃ so samāpanno, vippasanno anāvilo.

‘‘Disvā pasannasumano, sambuddhaṃ aparājitaṃ;

Tāhaṃ maghavapupphena, sayambhuṃ pūjayiṃ tadā.

‘‘Ekanavutito kappe, yaṃ pupphamabhipūjayiṃ;

Duggatiṃ nābhijānāmi, buddhapūjāyidaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā maghavapupphiyo thero imā gāthāyo abhāsitthāti.

Maghavapupphiyattherassāpadānaṃ pañcamaṃ.

6. Upaṭṭhākadāyakattheraapadānaṃ

‘‘Rathiyaṃ paṭipajjantaṃ, āhutīnaṃ paṭiggahaṃ;

Dvipadindaṃ mahānāgaṃ, lokajeṭṭhaṃ narāsabhaṃ.

‘‘Pakkosāpiya tassāhaṃ, sabbalokahitesino;

Upaṭṭhāko mayā dinno, siddhatthassa mahesino.

‘‘Paṭiggahetvā [paṭiggahesi (ka.)] sambuddho, niyyādesi mahāmuni [mahāisi (ka.)];

Uṭṭhāya āsanā tamhā, pakkāmi pācināmukho.

‘‘Catunnavutito kappe, upaṭṭhākamadaṃ tadā;

Duggatiṃ nābhijānāmi, upaṭṭhānassidaṃ phalaṃ.

‘‘Sattapaññāsito kappe, balasenasanāmako;

Sattaratanasampanno, cakkavattī mahabbalo.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā upaṭṭhākadāyako thero imā gāthāyo abhāsitthāti.

Upaṭṭhākadāyakattherassāpadānaṃ chaṭṭhaṃ.

7. Apadāniyattheraapadānaṃ

‘‘Apadānaṃ sugatānaṃ, kittayiṃhaṃ mahesinaṃ;

Pāde ca sirasā vandiṃ, pasanno sehi pāṇibhi.

‘‘Dvenavute ito kappe, apadānaṃ pakittayiṃ;

Duggatiṃ nābhijānāmi, kittanāya idaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā apadāniyo thero imā gāthāyo abhāsitthāti.

Apadāniyattherassāpadānaṃ sattamaṃ.

8. Sattāhapabbajitattheraapadānaṃ

‘‘Vipassissa bhagavato, saṅgho sakkatamānito;

Byasanaṃ me anuppattaṃ, ñātibhedo pure ahu.

‘‘Pabbajjaṃ upagantvāna, byasanupasamāyahaṃ;

Sattāhābhirato tattha, satthusāsanakamyatā.

‘‘Ekanavutito kappe, yamahaṃ pabbajiṃ tadā;

Duggatiṃ nābhijānāmi, pabbajjāya idaṃ phalaṃ.

‘‘Sattasaṭṭhimhito kappe, satta āsuṃ mahīpatī;

Sunikkhamāti ñāyanti, cakkavattī mahabbalā.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā sattāhapabbajito thero imā gāthāyo abhāsitthāti.

Sattāhapabbajitattherassāpadānaṃ aṭṭhamaṃ.

9. Buddhupaṭṭhāyikattheraapadānaṃ

‘‘Veṭambhinīti [veṭambarīti (sī.), vedhambhinīti (syā.)] me nāmaṃ, pitusantaṃ [pitā’santaṃ (?)] mamaṃ tadā;

Mama hatthaṃ gahetvāna, upānayi mahāmuniṃ.

‘‘Imemaṃ uddisissanti, buddhā lokagganāyakā;

Tehaṃ upaṭṭhiṃ sakkaccaṃ, pasanno sehi pāṇibhi.

‘‘Ekattiṃse ito kappe, buddhe upaṭṭhahiṃ [paricariṃ (sī. syā.)] tadā;

Duggatiṃ nābhijānāmi, upaṭṭhānassidaṃ phalaṃ.

‘‘Tevīsamhi ito kappe, caturo āsu khattiyā;

Samaṇupaṭṭhākā nāma, cakkavattī mahabbalā.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā buddhupaṭṭhāyiko thero imā gāthāyo abhāsitthāti.

Buddhupaṭṭhāyikattherassāpadānaṃ navamaṃ.

10. Pubbaṅgamiyattheraapadānaṃ

‘‘Cullāsītisahassāni , pabbajimha akiñcanā;

Tesaṃ pubbaṅgamo āsiṃ, uttamatthassa pattiyā.

‘‘Sarāgā sabhavā [samohā (syā.)] cete, vippasannamanāvilā;

Upaṭṭhahiṃsu sakkaccaṃ, pasannā sehi pāṇibhi.

‘‘Khīṇāsavā vantadosā, katakiccā anāsavā;

Phariṃsu mettacittena, sayambhū aparājitā.

‘‘Tesaṃ upaṭṭhahitvāna, sambuddhānaṃ patissato;

Maraṇañca anuppatto, devattañca agamhase.

‘‘Catunnavutito kappe, yaṃ sīlamanupālayiṃ;

Duggatiṃ nābhijānāmi, saññamassa idaṃ phalaṃ.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā pubbaṅgamiyo thero imā gāthāyo abhāsitthāti.

Pubbaṅgamiyattherassāpadānaṃ dasamaṃ.

Paṇṇadāyakavaggo ekūnatiṃsatimo.

Tassuddānaṃ –

Paṇṇaṃ phalaṃ paccuggamaṃ, ekapupphi ca maghavā;

Upaṭṭhākāpadānañca , pabbajjā buddhupaṭṭhāko;

Pubbaṅgamo ca gāthāyo, aṭṭhatālīsa kittitā.

* Bài viết trích trong Khuddakanikāya >> Suttapiṭaka >> Tipiṭaka (Mūla), nguồn Tipitaka.org. Tải sách PDF tại đây.